O cemiterio de San Facundo de Ribas de Miño, único en Galicia con todas as lápidas en galego

San Facundo de Ribas de Miño

Ao ser o cemiterio parroquial de San Facundo de Ribas de Miño, no Concello lucense de Paradela, o único de Galicia que ten todas as súas lápidas en galego, a Asociación de Funcionarios para a Normalización Lingüística de Galicia e o Concello de Paradela, coa colaboración da Secretaría Xeral de Política Lingüística, van celebrar o próximo trinta e un de outubro, nas vísperas das dúas festividades de “Todos os Santos e de Todos os Defuntos” un acto en Paradela de reafirmación do uso do idioma galego.

O acto comezará na casa do Concello de Paradela, ás doce da mañán, onde o alcalde, José Manuel Mato dará a benvida aos participantes, e aos paradelenses que desexen sumarse a esta celebración.

De seguido, os presentes que o desexen asinarán a acta de REAFIRMACIÓN DE GALEGUIDADE, que se ven suscribindo neste tipo de actos, na que os presentes interesados participan na iniciativa EN GALEGO, AGORA E SEMPRE, declarando querer que a súa despedida vital, funerais e todas as cerimonias de despedida da vida, sexan feitas en idioma galego.

O acto no Concello finalizará coas palabras do Presidente da Asociación de Funcionarios para a normalización lingüística, Xosé González Martínez, e o Secretario Xeral de Política Lingüística da Xunta de Galicia, Valentín García Gómez.

Desde a capital do concello, os participantes desplazaranse ao cemiterio de San Facundo de Ribas de Miño, onde se descubrirá unha placa que deixa constancia desta celebración, visitarase o cemiterio e a igrexa, e o crego e musicólogo Xesús Mato Mato, fillo predilecto do concello de Paradela, rezará un responso polos que descansan naquel cemiterio, con todas as súas lápidas en galego.

Deixar comentario

Please enter your comment!
Please enter your name here