Nunha calorosa tarde de verán o castelo de Soutomaior convertíuse un ano máis nunha celebración da lingua e da cultura galegas. Os 3 premiados recibiron o apoio de máis de 150 persoas que ateigaron o Patio de Armas do Castelo.
D. Xosé González Martínez no seu discurso de benvida avogou pola necesidade de ser galeguistas a tempo completo afondando na obriga individual de que se non se é galego parlante polo menos que se sexa galego escoitante.
Palabras acaidas das louvas a cargo de D. Xermán García Cancela, D. Xosé Maria Lema Suárez e Dna. Diana Gonçalves Dominguez, membros do xurado e a música a cargo de Carolina Rubirosa e Rafael Otero amenizaron un acto de recoñecemento a 2 persoas e 1 institución que co seu traballo arreo e constante fan que a lingua galega sexa lingua de uso en diferentes ámbitos sociais, eixo fundamental para que exista unha plena normalización do noso idioma na sociedade.
A presidencia formada por D. Manuel Lourenzo Sobral, alcalde do concello de Soutomaior que entregou o premio ao alcalde do concello de Carballo, D. Evencio Ferrero Rodríguez que o recibíu en nome de todo o pobo de Carballo reivindicando o traballo tanto de anteriores rexedores municipais como da cidadanía e do persoal da propia administración pública.
D. Jorge Cubela López, deputado provincial de Cultura en representación da Deputación Provincial de Pontevedra entregou o premio a D. Carlos Pajares, Científico, investigador emérito e asesor da Unión Europea en plans de estudo de Física, é fundador do Instituto Galego de Altas Enerxías e ex-Reitor da Universidade de Santiago de Compostela (USC).
Dna. Lara Meneses Álvarez, directora xeral de xuventude en representación da Xunta de Galicia entregou o premio a Dna. M.ª Jesús Lago Vilaboa, Xefa de servizo de Traballo Social da Área Sanitaria de Vigo, por ser pioneira e defensora do uso do galego no ámbito sanitario.
Unha ampla representación institucional, premios Peña Novo doutras edicións, funcionarios, concelleiros e concelleiras, amigos e amigas dos premiados fixeron que un ano máis Soutomaior fose unha eira de galeguidade na celebración da XXVIII edición dos Premios Lois Peña Novo.
