A Irmandade Xurídica Galega ten un papel de divulgación do galego na Xustiza e pretende que se normalice o seu uso. Malia que queda moito camiño por andar, o presidente da Irmandade recoñece que a situación cambiou bastante con respecto a hai 30 ou 40 anos. Porén, exixe axuda das Administracións públicas.
A Irmandade Xurídica Galega realizou onte un acto en Celanova para recordar a primeira vez que se empregou o galego no seu xulgado. En que consistiu?
O que conmemoramos foi que o xulgado de Celanova entregou unha sentenza en galego nun proceso xudicial por primeira vez hai 25 anos. Ademais, a Irmandade Xurídica Galega fundámola no ano 2008 en Celanova. Foi un acto singular porque o noso primeiro evento como colectivo de xuristas preocupados polo galego realizouse no Mosteiro de San Rosendo, en Celanova.
