A Irmandade da Sanidade Galega organizou unha homenaxe para lembrar o médico falecido
O médico Carlos Guitián xa conta coa súa placa conmemorativa na avenida de La Habana. A Irmandade da Sanidade Galega celebrou onte unha emotiva homenaxe para lembrar o doutor, quen faleceu o pasado mes de xaneiro. Ao acto asistiu, entre outros, o presidente do Parlamento de Galicia, Miguel Santalices, quen rendeu tributo a Guitián, un profesional da Escola Médica Compostelá moi comprometido coa galeguización do sistema sanitario.
A memoria de Guitián incluíu a descuberta dunha placa na casa que habitou na céntrica avenida ourensá. Posteriormente, o Paraninfo do Otero Pedrayo acolleu un acto no que se lembraron logros da súa carreira.
Guitián naceu en 1927 en Ourense. Implicouse en diversos movementos galeguistas, chegando a militar no Partido Socialista Galego (PSG) e no BNG despois. Foi un dos fundadores da Asociación Cultural Auriense, creada en 1967. Tamén é salientable o seu compromiso ecoloxista, posicionándose en contra de proxectos coma unha celulosa en Barbantes ou un encoro no río Barbantiño.
Guitián non destacou menos no seu desempeño profesional. Foi un dos urólogos pioneiros na aplicación da resección transuretral endoscópica con intervención mínima, que logo se xeralizou na sanidade.
